Германската влада го поедноставува купувањето оружје

Според волјата на германската влада, Бундесверот во иднина треба да може да набавува воена опрема многу побрзо, за што одобри соодветен нацрт-закон. „Сакаме да го забрзаме процесот на набавка за да ја направиме  Германија побезбедна“, изјави (23.07.2025) министерот за одбрана Борис Писториус (СПД). Тој зборуваше за „револуционерен закон“ и „квантен скок“.

Планот претставува проширување на почетниот закон од 2022 година. Набавката веќе беше забрзана на почетокот на руската агресорска војна против Украина. Во светлината на  новите цели на НАТО  и плановите за значително проширување на Бундесверот, инфраструктурата исто така мора да расте соодветно. На пример, принудата за тендери за договори за вооружување  и еколошки стандарди, на пример во изградбата на касарни, треба да се олабави.

Поголемите договори повеќе не треба да се делат на помали тендери. Судските жалби по доделувањето на договори не треба да имаат суспензивен ефект. Понатаму, производството на оружје, муниција и воена опрема во Германија ќе има приоритет, бидејќи претставува „значаен безбедносен интерес“.

„Ни треба повеќе воена опрема, и ни треба побрзо. Ова може да се постигне само со проширување на производството“, рече министерката за економија Катерина Рајхе (ЦДУ). Планираниот закон сега ќе ги опфаќа „сите воени добра без исклучок“ во набавките, рече Рајхе.

Сојузната полиција исто така ќе биде подобро опремена. Кабинетот одобри употреба на таканаречени тејзери низ целата земја. Првично, треба да се купат 10.000 вакви уреди. Пет милиони евра веќе се наменети за оваа намена оваа година.

Тејзерот е уред кој испушта електрични шокови од далечина, предизвикувајќи болни мускулни контракции. Ова обично го онеспособува лицето. Ова оружје е контроверзно бидејќи тејзерите можат да имаат здравствени последици кога се користат против луѓе со срцеви заболувања или кардиоваскуларни проблеми.