Подобра подготвеност за екстремни временски услови

Германското министерство за заштита на животната средина сака подобро да ги подготви градовите и општините за екстремни временски услови. Целта е да се задржи повеќе вода во природата и да се обезбеди природно ладење. „Природата е нашиот најважен сојузник – и против жештините и сушите, и против силните дождови и поплавите“, изјави министерот за заштита на животната средина, Карстен Шнајдер за неговата нова иницијатива. „Ако го направиме тоа како што треба, тоа ќе ни помогне да складираме вода и да ја разладиме околината“.

Притоа, тој сака да се фокусира на уличните дрвја, на шумите приспособени на климата, на повторното создавање на влажни мочуришта и на отворени површини. Таквите мерки треба да станат полесни и побрзи за спроведување во иднина. За таа цел, некои постоечки програми ќе бидат значително проширени: на пример, програмата за финансирање „Природна заштита на климата во општините“ ќе се зголеми од нешто помалку од 180 на повеќе од 380 милиони евра, меѓу другото, за да се засадат повеќе дрвја во градовите.

„Секое евро инвестирано денес во мерки за природна заштита на климата и прилагодување на климатските промени заштедува повеќекратни трошоци од климатските промени и нивните негативни последици“, се наведува во „Иницијативата за складирање и ладење на вода“, објавена од министерството.

Мешани листопадни шуми како цел

Според германското министерство, има голем интерес за програмата „Природна заштита на климата во општините“, која го поттикнува создавањето и зачувувањето на зелените површини. За да се избегне замрзнување на финансирањето поради ограничените ресурси оваа година, средствата предвидени за идните години ќе се користат порано. Ќе се додадат и нови мерки. Според Шнајдер, незапечатените површини и уличните дрвја можат да направат забележлива разлика во температурите во градовите за време на летото.

Достапни се и повеќе средства за реструктуирање на шумите. Шнајдер планира да ја зголеми програмата „Шумско стопанисување приспособено на климата“ за десет милиони евра, со годишен буџет од 145 милиони евра во текот на десет години, како што најави неговото министерство. Целта е да се создадат мешани листопадни шуми богати со видови, кои подобро се справуваат со порастот на температурите отколку смрековите шуми што доминираат во многу делови на Германија. Според минатогодишниот Извештај за состојбата на шумите, само едно од пет дрвја е здраво.

„Во руралните подрачја шумите и мочуриштата функционираат како природни системи за климатизација и истовремено складираат вода“, вели Шнајдер. Тој сака да ја дополни финансиската поддршка за повторно навлажнување на исушените мочуришта со вода и поддршката за управување со земјоделското земјиште. Тоа вклучува одгледување растенија, како што е трската. Мочуриштата и помагаат на климата, меѓу другото, со складирање на јаглерод диоксид.

Нов основ за буџет од 2026 година

Сојузниот буџет за тековната година е одобрен од владата, но сè уште треба да биде усвоен од Бундестагот. Владата планира да го одобри нацрт-буџетот за 2026 година до крајот на јули. Според Министерството, тешко е да се одреди колку пари вкупно ќе бидат доделени за мерките за прилагодување на климатските промени. Сојузната влада има намера систематски да води евиденција за тоа колку средства се вложуваат во оваа област во сите министерства, но дури од 2026 година.