Германија: Мерц повикува на поголемо европско лидерство

Германскиот канцелар Фридрих Мерц изрази загриженост за улогата на Европа во светот. „Она што ме загрижува и, морам да признаам, ме оптоварува е фактот дека ние како Европејци во моментов не ја играме улогата во светот која всушност ја сакаме и треба да ја играме, за соодветно да бидат заштитени нашите интереси“, рече лидерот на ЦДУ во интервју за партискиот канал ЦДУ.TВ, кое е објавено денеска попладне.

Како пример, тој ја наведе дипломатијата околу војната во Украина. „Во моментов не сме во можност да извршиме доволен притисок врз Путин да заврши оваа војна“, рече Мерц. „Зависиме од помошта на Американците.“ Во исто време, земји како Кина, Индија и Бразил влегуваат во нови партнерства со Русија. 

Мерц сака поголем германски ангажман

Сепак, Мерц позитивно го оцени фактот дека Европа се враќа во ново единство. „Тоа во голема мерка зависи од ангажманот на германската сојузна влада, а во овој случај, во голема мера од ангажманот на германскиот канцелар“, рече тој. „Не се преценувам себеси, туку улогата што се очекува од нас. И се обидувам да ги исполнам тие очекувања, бидејќи тие се и во наш сопствен интерес.“