Критики кон Добринт за враќањето азиланти од границите

Дали сојузната влада може трајно да го продолжи одбивањето на барателите на азил на границите, прогласено за незаконско од страна на  Берлинскиот управен суд,  според експертите за миграциско право, останува отворено прашање.

Претседателот на Експертскиот совет за интеграција и миграција, Винфрид Клут, за новинската агенција ДПА изјави дека одлуката на берлинскиот суд е „целосно во согласност со преовладувачкото мислење во миграциското право и претходната судска пракса на Европскиот суд на правдата“ (ЕСП). Конкретниот случај се однесуваше на тројца Сомалијци кои беа вратени во Полска од Франкфурт (на Одра).

На 7 мај, сојузниот министер за внатрешни работи  Александар Добринт (ЦСУ) нареди интензивирање на граничните контроли  и во иднина  барателите на азил да бидат враќани на границата.

Берлинскиот управен суд во понеделник во итна постапка пресуди дека одбивањето на барателите на азил при граничните контроли на германска територија е незаконско. Тие не треба да бидат вратени без да се разјасни која држава од ЕУ е одговорна за нивното барање за азил.

Експерт: Колку е одржлива клаузулата за вонредна состојба 

По судската одлука, Добринт изјави дека сепак ќе се продолжи со одбивање на барателите на азил на границите, дека пресудите на Берлинскиот управен суд се само одлуки за поединечни случаи. Политичарот од  ЦСУ  објави дека ќе побара таканаречена главна постапка, Добринт изрази увереност дека тогаш неговата политика ќе биде потврдена.

Експертот за миграциско право Клут објаснува: „Новата сојузна влада сака да го принуди судството да го промени својот став“. На крајот, целта е да се добијат одлуки од Европскиот суд на правдата што нудат поголема флексибилност. Понатаму, се прават обиди да се етаблира нова аргументација за толкувањето на одржувањето на јавниот ред и заштитата на внатрешната безбедност според член 72 од Договорот за функционирање на Европската унија, наведувајќи ја преоптовареноста на општините. Оваа таканаречена клаузула за итна состојба дозволува исклучоци. „Дали може да се извлечат заклучоци за Германија како целина од ситуацијата во поединечните општини е многу дискутабилно“, истакнува експертот.

Сѐ додека надлежниот врховен суд изречно не одлучи поинаку, можно е да се бара ново, претходно  неетаблирано толкување на нормата, објаснува Клут. Сепак, овој случај го отвора и прашањето кој може да утврди дека постои вонредна ситуација во смисла на член 72. „Ова е одлука од далекусежно значење бидејќи делумно го поткопува приматот на правото на Унијата“, истакнува правникот. Според него, таквата одлука би требало да ја донесе целата сојузна влада или дури и Бундестагот - слично на одлуката за епидемиската состојба од национално значење за време на пандемијата на коронавирусот. Потоа, ова би требало формално да им се соопшти на соседните држави и на Комисијата на ЕУ.

„Сојузната влада ќе ги изгуби сите случаи“

Експертот за миграција, Гералд Кнаус, исто така критички го гледа концептот на одбивања на германската граница. „Сојузната влада ќе ги изгуби сите случаи што ќе стигнат на суд, па сè до Европскиот суд на правдата. Единствено прашање е колку долго сакаат да продолжат со ова“, рече Кнаус во подкастот „5-минутен разговор“ на списанието „Штерн". Кнаус е иритиран поради најавата на Добринт дека ќе се држи до контроверзниот концепт: „Во одреден момент, СПД -  на крајот на краиштата, таа го назначува министерот за правда - ќе мора да го постави прашањето: како всушност може некој да ја испрати сојузната полиција да направи нешто што е очигледно нелегално?“

Шефот на кабинетот на канцеларот ги брани одбивањата

Шефот на кабинетот на канцеларот, Торстен Фрај, ги брани одбивањата на границите. Одлуката на судот не е неуспех, оцени Фрај во понеделник во емисијата „РТЛ директ“. „Ветивме дека сакаме  да ја регулираме, контролираме и ограничиме миграцијата,  за да постигнеме пресврт во миграциската политика“.

Одбивањата се „суштински дел, меѓу многу други работи“. Пресудата на Берлинскиот управен суд досега е само одлука во забрзана постапка, рече Фрај. „Станува збор за донесување суштинска одлука, каде што потоа можете да се осврнете на аргументите на судот и, пред сè, јасно да ги презентирате сопствените причини“. Судот даде некои насоки во врска со образложувањето на вонредната состојба, продолжи политичарот од ЦДУ. „Тоа  очигледно треба да се преработи. Но, ние ќе го сториме тоа“.

Критика од СПД

Политичарот на СПД, Ралф Штегнер, го критикуваше сојузниот министер за внатрешни работи Добринт по пресудата во Берлин. СПД отсекогаш „инсистирала на хуманост и почитување на германскиот и европскиот закон на нашите национални граници“ во политиката за азил, изјави Штегнер за списанието „Шпигел“. Конзервативците отсекогаш лежерно го отфрлале ова. За време на изборната кампања, постоеше „добро познатата, остра реторика на отфрлање од страна на Унијата, особено од ЦСУ“. ЦСУ сега се соочува со практичниот тест на владиното дејствување. „Ова можеби нема да помине без неколку политички гребнатинки за г-дин Добринт, така се случува“, рече Штегнер, кој учествуваше во коалициските преговори меѓу ЦДУ, ЦСУ и СПД за домашната и миграциската политика.

Зелените: „Наметнување курс во стилот на Трамп“

Остри критики за политиката на ЦДУ/ЦСУ кон бегалците пристигнаа и од опозицијата. „Сомнително е и многу е проблематично постојано да се обидуваме максимално да ја тестираме законската рамка и да го прифатиме ризикот од кршење на законот“, изјави лидерот на Партијата на зелените, Феликс Банашак, за весниците на медиумската групација Функе. Тој ги обвини ЦДУ/ЦСУ под водство на канцеларот  Фридрих Мерц дека се обидуваат да „го наметнат својот курс во стилот на Трамп“ со остри најави и правно јасно неодржливи инструкции. Банашак повика на заедничка акција во Европа за да се работи кон „вистински подобрувања“ во миграциската политика. „Мерките што го поткопуваат европското право не се корисни во овој поглед; тие само создаваат хаос“.

Лидерот на Левичарската партија, Јан ван Акен, во весникот „Рајнише пост“ ја обвини сојузната влада дека го крши постојниот закон „само затоа што ѝ требаат жртвени јарци“. Сојузната влада се занимава со „говор на омраза“ против мигрантите за да го одвлече вниманието од фактот дека води „политики против мнозинството луѓе  овде во земјата“.