ЕЦБ дополнително ги намалува каматните стапки

Каматните стапки во eврозоната продолжуваат да паѓаат. Клучната депозитна стапка e намалена за 0,25 процентни поени на 2,0 проценти. Ова е осмо намалување на каматната стапка откако ЕЦБ се префрли на  курс на олабавување во средината на 2024 година.

Овој потег беше очекуван од експертите откако  инфлацијата во еврозоната продолжи да се намалува.Стапката на инфлација во еврозоната падна на 1,9 проценти во мај, дури и под целната инфлација на ЕЦБ од два проценти.

Покрај тоа, производствените цени во еврозоната во април паднаа повеќе од очекуваното. Во индустријата, тие забележаа намалување за 2,2 проценти во споредба со претходниот месец, како што соопшти статистичката служба Евростат. Економистите анкетирани од новинската агенција Ројтерс очекуваа пад од само 1,8 проценти, по падот од 1,7 проценти во март. Главната причина за овој развој на настаните: цените на енергијата паднаа за 7,7 проценти во април, по намалувањето од 5,8 проценти во претходниот месец.Производствените цени важат од производството, што значи пред производите дополнително да се преработат или со нив да се тргува. Затоа, тие можат да послужат како ран индикатор за развојот на потрошувачките цени.