Еврокомисија: Бугарија може да го воведе еврото

Европската комисија даде зелено светло за воведување на еврото во Бугарија. Земјата ги исполни неопходните критериуми за воведување на заедничката валута следната година, објави Комисијата во средата. Економијата на Бугарија е доволно подготвена за тоа, соопшти и Европската централна банка (ЕЦБ).

„Бугарија денеска е чекор поблиску до воведувањето на еврото“, честиташе претседателката на Европската комисија, Урсула фон дер Лајен. Источноевропската земја ќе го „заземе своето заслужено место во обликувањето на клучните одлуки на еврозоната“.

Владата во Софија покажа „огромен напор“ за спроведување на неопходните промени, објасни главниот економист на ЕЦБ, Филип Лејн. Бугарија веќе сакаше да го воведе еврото во изминатите години, но не успеа поради високата инфлација во земјата.

Минатата година, зголемувањето на цените, според Комисијата, изнесуваше просечно 2,7 отсто, што е малку под референтната вредност. „Одржлива ценовна стабилност“ е еден од предусловите за воведување на еврото: просечната инфлација за една година не смее да биде повеќе од 1,5 процентни поени над стапката на инфлација на трите земји од еврозоната со најниска инфлација.

Критериумите исто така вклучуваат државен буџет без прекумерни долгови и стабилен девизен курс поврзан со еврото. Досегашната национална валута, левот, веќе беше поврзана со еврото преку механизам за девизен курс од 2020 година.

Бугарија, со своите 6,4 милиони жители, би била 21-та и истовремено најсиромашна членка на еврозоната. Министрите за финансии на земјите од ЕУ сè уште треба да ја одобрат одлуката, а овој чекор се очекува во јули. Бугарија би можела да ја воведе заедничката валута на 1 јануари 2026 година.