ЕУ го подготовува својот одговор на царините на Трамп

Земјите членки на Европската Унија, според очекувањата, во текот на денешниот ден (9.04) треба да ги објават првите контрамерки што ќе се преземат против царините на американскиот претседател Доналд Трамп.

Европската Комисија, која ја координира трговската политика на ЕУ, според информации на агенцијата Ројтерс, предлага дополнителни царини главно во висина од 25% на низа производи кои се увезуваат од САД, почнувајќи од мотоцикли, живина, овошје, дрво и облека сѐ до конец за чистење заби.

Дополнителните царини би требало да стапуваат во сила во фази.

Царините на Трамп најверојатно ќе имаат поголемо влијание врз Еврозоната отколку што првично проценуваше Европската централна банка, јавува Ројтерс повикувајќи се на неименувани извори. ЕЦБ минатиот месец прогнозираше дека евентуална трговска војна би го намалила порастот во Еврозоната за 0,5 проценти во првата година и дека доколку Унијата посегне по контрамерки, дури и ако тие бидат привремени, тоа ќе се одрази врз цените. 

Претседателката на Европската Комисија, Урсула фон дер Лајен, неделава даде увид во досегашните предлози на Европа во врска со американските царини и откри дека било понудено билатерално ослободување од царини за автомобили и други индустриски производи. Реакцијата на ваквиот предлог од страна на САД не беше позитивна.