Објектот што се урна во Полска - руска верзија на „Шахед“

Во источна Полска, првично неидентификуван објект се урна и експлодираше во поле со пченка. Според новинската агенција ПАП, притисокот на експлозијата предизвикал кршење на прозорци во неколку куќи, нема повредени. Полицијата пронашла изгорени метални и пластични остатоци во полето со пченка во близина на селото Осини во источната полска покраина Лублин. 

Полското јавно обвинителство сега објави дека станува збор за воен дрон. Оштетен е од експлозив, изјави окружниот обвинител Гжегож Трусиевич за време на прес-конференцијата во Осини.

Објектот што ноќеска се урна на поле со пченка во источна Полска беше руска верзија на дронот „Шахед“, изјави за „Ројтерс“ портпаролот на полското министерство за надворешни работи, Павел Вронски.

Полските медиуми објавија видео кое наводно го прикажува моментот на експлозијата во источна Полска.

Министерот за одбрана Владислав Косињак-Камиш изјави дека властите не ја исклучуваат можноста објектот да бил руски чин на саботажа или дрон што се користел за шверцување. Армијата претходно изјави дека можеби е дел од стар пропелер. Меѓутоа, претходно не е регистрирано нарушување на полскиот воздушен простор од Украина или Белорусија. Според украинската војска, сирените за воздушен напад се огласувале околу еден час во украинските гранични региони Волиња и Лавов утрово, но немало извештаи за воздушни напади во овие региони.

Весникот „Жечпосполита“, повикувајќи се на неофицијални информации, објавува дека објектот би можел да биде  дрон „Шахед“.  Русија користи  ирански дронови „Шахед“ во својата агресорска  војна против Украина.  Во последните години од војната, руските ракети неколку пати го нарушиле полскиот воздушен простор. Во 2022 година, две лица загинаа кога ракета се урна во источна Полска. Причината во тој случај беше погрешно насочена украинска противвоздушна ракета.