Десниот националист Навроцки победи на изборите во Полска

Кандидатот на десничарската националистичка партија Право и правда (ПиС), Карол Навроцки, ќе биде нов претседател на Полска. Според изборната комисија, тој тесно победи во вториот круг на изборите со 50,89 проценти освоени гласови.

Проевропскиот владин кандидат, либералниот градоначалник на Варшава, Рафал Часковски, доби 49,11 проценти гласови. Првичните проекции по затворањето на избирачките места покажаа тесно водство на Часковски.

Изборот на Навроцки се смета за тежок удар за владата на либерално-конзервативниот премиер Доналд Туск. Победа на Часковски ќе му дадеше нов импулс на Туск и неговите реформи. Тие беа блокирани од претходниот деснонационалистички претседател Анджеј Дуда.

Карол Навроцки е политички новајлија. Тој водеше кампања под слоганот „Полска на прво место“. Навроцки ги обвинува приближно еден милион украински бегалци во неговата земја дека профитираат од Полска. Обожавателот на американскиот претседател Доналд Трамп, исто така, се спротивставува на пристапувањето на Украина во НАТО.

Претседателските избори се сметаат за клучни за Полска. Интересот за нив беше висок. Излезноста на гласачите, речиси 72 проценти, беше поголема отколку во првиот круг.