Ден на протести во Израел

Во Израел започна ден на протести со барања за итно ослободување на заложниците и крај на војната во Газа. Низ целата земја се одржуваат демонстрации, а има и блокади на патиштата. Блокиран беше главен автопат во близина на Тел Авив, а демонстрантите палеа гуми на пат северно од градот, јавува агенцијата ДПА.

Форумот на роднини на израелските заложници повика на разни протестни акции под слоганот „Израел е обединет“. Тие го обвинуваат израелскиот премиер Бенјамин Нетанјаху за продолжување на војната од политички причини. Неговите крајно десничарски коалициски партнери, од кои зависи неговиот политички опстанок, се противат на прекин на огнот.

За вечерва по локално време е планиран голем собир на „Плоштадот на заложниците“ во центарот на Тел Авив. Пред нешто повеќе од една недела, стотици илјади Израелци на големи демонстрации ја изразија својата солидарност со заложниците. Во Појасот Газа се држат вкупно уште 50 заложници, од кои 20 се наводно живи.

Исламистичката терористичка организација Хамас пред нешто повеќе од една недела објави дека се согласила со нов предлог за прекин на огнот од посредниците Египет и Катар. Според медиумските извештаи, тоа е адаптирана верзија на претходно договорениот предлог од страна на специјалниот претставник на САД, Стив Виткоф. Тој предвидува 60-дневен прекин на огнот, во кој првично би биле ослободени десет живи заложници во замена за палестински затвореници.

По нападите врз болницата Насер, Израел најавува истрага

Израел изрази жалење по смртоносните напади врз болницата Насер во јужниот дел на Појасот Газа. „Израел ја цени работата на новинарите, медицинскиот персонал и сите цивили“, се вели во соопштението од кабинетот на премиерот Бенјамин Нетанјаху. Израел, како што се тврди, длабоко жали за трагичниот инцидент. Воените власти спроведуваат темелна истрага, се додава во соопштението. Во соопштение, портпаролката на армијата, Ефи Дефрин, тврди дека Израел не напаѓа намерно цивили. „Хамас ја започна оваа војна и создаде невозможни услови“, оценува Дефрин.

Во нападите врз болницата загинаа 20 лица, меѓу кои и петмина новинари. Агенциите Ројтерс и Асошиетед прес во заедничко писмо побараа објаснување од израелските власти за инцидентот.

„Огорчени сме што независни новинари се меѓу жртвите на овој напад врз болницата, место кое е заштитено со меѓународното право“, се наведува во писмото. Новинарите, се вели, биле таму во професионална функција и вршеле важна работа како сведоци. Агенциите се жалат поради тоа што Израел од почетокот на конфликтот им забрани на меѓународните новинари да влегуваат во Појасот Газа, освен за посети организирани од војската.