Четворица загинати во несреќа на жичарница во Италија

Четири лица загинаа при пад на кабина на жичарница во близина на италијанскиот град Неапол. Кабината паднала во длабочините откако се скинала сајла, несреќата се случила во местото Кастеламаре ди Стабија, како што соопшти  италијанската планинарска спасувачка служба.

Жичарницата води до повеќе од 1.100 метри високиот планински врв Монте Фаито, од каде вообичаено може да се ужива во погледот на Неаполскиот залив. Видливоста вчера била слаба поради густата магла.

Во кабината имало пет лица. Според властите, тројца од загинатите се странски туристи, двајца од Англија, еден од Израел, а еден е Италијанец.

Повеќе од десет други патници се спасени од другите кабини на жичарницата со користење јажиња. Во акцијата на спасување учествуваа и хеликоптери, но маглата ја отежна спасувачката работа.

Жичарницата работи од 1952 година. Возењето до планинскиот врв со неа обично трае нешто помалку од десет минути. На жичарницата во 1960 година веќе  се случила фатална несреќа.  Во тоа време, четири лица загинале, а повеќе од 30 биле повредени при пад на кабина.

Во летото 2021 година, кабина при спуштање беше заглавена повеќе од еден час со 31 патник поради прекин на струја, но никој не беше повреден.