Берлин: Забрана за „Кралството Германија“

Полицијата од раните утрински часови претресува вкупно 14 објекти во седум сојузни покраини кои се поврзани со таканареченото „Кралство Германија“ (КРД). Претреси се вршат меѓу другото во Саксонија, Саксонија-Анхалт, Тирингија, Долна Саксонија, Бранденбург и Баден-Виртемберг.

Фокусот на мерките е Халсбрике во Саксонија. Таму бил уапсен и Петер Фицек, самопрогласениот крал. Против него веќе неколку недели е издадена потерница, која сега е спроведена. Во Саксонија се вршат претреси и на четири други локации, вклучувајќи и објекти во Лајпциг и Дрезден.

„Канцеларски посед“ како седиште на самопрогласениот крал

Фицек со години се смета за една од најистакнатите фигури на  сцената на „Граѓани на Рајхот"  и тоа не само поради неговата препознатлива долга плетенка. Имотот во Халсбрике, познат како „канцеларски посед", досега служел како седиште на 59-годишникот, покрај станбена зграда, на него има и фарма за домашни животни и погон за производство на сирење. Таму живеат и неколку „поданици".

Со оваа забрана, Сојузното министерство за внатрешни работи сега конечно правно го санкционира Фицек и неговото „кралство", откако државата со години презема мерки против разновидните активности на „Петер Први“, како што тој самиот се нарекува.

Фицек сега се соочува и со кривично гонење. Сојузниот јавен обвинител во Карлсруе веќе извесно време истражува за формирањето на криминална организација во кругот на „Петер Први“ и веќе поднел барање за потерници против „кралот“ и уште тројца членови на организацијата.

Обвинителството гледа, меѓу другото, докази за криминални финансиски и осигурителни трансакции и се смета за одговорно поради „особената важност“ на случајот.

„Церемонија на крунисување“ во Лутерштат-Витенберг

Сè започна во 2012 година: Петер Фицек, поранешен готвач и инструктор по карате, се круниса за крал на Германија во Лутерштат-Витенберг. Неговото „кралство“ во тоа време се состоеше од имот во градот, поранешна болница. Таму, во склад со идеологијата на  движењето „Граѓани на Рајхот“,  не требало да важат законите на Сојузна Република Германија.

Фицек на својата фантазиска држава ѝ дал сопствен устав со себе како шеф на државата, а во следните години вложил максимални напори да ја прошири својата „територија“ со помош на дополнителен недвижен имот и да регрутира „поданици".

„Поданиците“ обезбедувале пари

Според неговиот сопствен извештај, неколку илјади луѓе се изјасниле дека се подготвени да станат „поданици“ на „кралството“, но според пребројувањето на Сојузната служба за заштита на уставот, која ги прогласи Фицек и неговото „кралство“ за предмет на набљудување, поверојатно е дека бројот бил неколку стотици. Многумина од нив биле спремни да му обезбедат финансиски средства, понекогаш и до милиони евра.

Фицек постојано смислувал нови проекти за да извади пари од џебовите на своите следбеници. Тој создал свој систем за пензиско и здравствено осигурување за своето „кралство“, како и своја валута, која можела да се купи со евра. Меѓу другото, тој рекламира дека „Кралството Германија“ им овозможува на луѓето да го напуштат системот на Сојузна Република Германија.

Фицек со години го преокупира судството

Државата со години презема мерки против овие практики. Неодамна, Вишиот регионален суд во Наумбург ја сослуша пресудата на Регионалниот суд Десау-Рослау, кој го осуди Фицек на осум месеци затвор за телесни повреди во септември 2024 година. Фицек поднесе жалба против пресудата, но таа беше неуспешна. Денеска беше извршена издадената потерница.

Судството со години низ сите инстанци се занимаваше и со други постапки. Фицек претходно беше обвинет и осуден за измама и нелегални банкарски трансакции, како и за прекршување на Законот за супервизија на осигурувањето. Сепак, пресудата на Регионалниот суд во Хале од 2017 година, која утврди дека Фицек проневерил 1,3 милиони евра од околу 550 инвеститори, беше поништена од Сојузниот суд на правдата и вратена назад до Регионалниот суд.

Фицек мораше да се појави на суд и поради возење без дозвола. На крајот на 2018 година, тој помина неколку месеци во затвор во Хале. Од неколку имоти кои извесно време му припаѓале на „кралството“, вклучувајќи го и замокот во Бервалде во Горна Лужица, се користел само уште само имотот во Халсбрике.

Сојузната служба за заштита на уставот ја надгледува сцената на „Граѓани на Рајхот"

„Граѓани на Рајх" се луѓе кои својата куќа или имот ја прогласуваат за своја држава и одбиваат да ги признаат законите на Сојузна Република Германија.  Идеологијата „Граѓани на Рајхот“ е под силно влијание на теориите на заговор според кои Сојузна Република не е суверена држава и затоа нејзините закони не се валидни. Според тоа, „Граѓаните на Рајх“ одбиваат да плаќаат даноци и такси.

Движењето значително порасна во последниве години и е набљудувано од Сојузната служба за заштита на Уставот. За 2023 година, Сојузната служба за заштита на Уставот го процени бројот на таканаречените „Граѓани на Рајхот“ и самоуправници на 25.000, од ​​кои секој десетти се смета за склон кон насилство. Според Сојузната служба за заштита на Уставот,  1.350 „ Граѓани на Рајхот“ се десничарски екстремисти. За време на полициските операции насочени кон разоружување на „ Граѓаните на Рајхот", дојде до неколку престрелки во кои полицајци беа убиени или тешко повредени.

Сојузното Министерство за внатрешни работи од денеска го забрани здружението „Кралство Германија“. Тоа значи дека името не смее повеќе да се користи, здружението ќе биде распуштено и сите средства ќе бидат конфискувани. Продолжувањето на активноста на здружението е казниво со закон. Фицек може да тужи против забраната.

Автори: Михаел Гетшенберг, АРД, Холгер Шмит, СВР