Трамп ја задржува командата над Националната гарда

Апелациски суд му одобри на американскиот претседател  Доналд Трамп  континуирана контрола врз Националната гарда во Лос Анџелес. Тричлен совет од судии ја донесе оваа одлука во четврток (локално време), поништувајќи ја одлуката на судија од пониска инстанца. Судот заклучи дека „претседателот веројатно легитимно го искористил своето законско овластување“ кога ја презел контролата врз Националната гарда. Тројцата судии сметаат дека гувернерот на Калифорнија, Гевин Њусом, нема право на вето против наредбата на претседателот, дури и ако федералната влада не го известила гувернерот на Калифорнија пред да ја распореди Гардата, како што е всушност пропишано со закон.

Минатата недела, Апелационен суд, по барање на Министерството за правда на САД, веќе привремено ја блокираше наредбата издадена од федералниот судија Чарлс Брејер во Сан Франциско. Брејер претходно го прогласи распоредувањето на трупите на Националната гарда  против желбите на гувернерот Њусом за незаконско и оцени дека  постапките на Трамп ги надминале неговите овластувања.  Владата на  САД аргументираше дека судовите не можат да ги преиспитуваат одлуките на претседателот и дека Трамп засега може да ја задржи контролата врз трупите. Со одлуката од четвртокот вечерта, Апелациониот суд сега пресуди во негова корист.

На спорот му претходеа  демонстрации во Лос Анџелес  против строгата имиграциска политика на Трамп и рациите за депортација од страна на имиграциските власти. Поради протестите, американската влада мобилизираше 4.000 војници на Националната гарда и  700 маринци од редовните вооружени сили  за распоредување во Лос Анџелес. Војниците пристигнаа постепено и, според желбите на Трамп, треба да останат во градот додека не помине опасноста. Гувернерот на Калифорнија, Њусом, се спротивстави на распоредувањето на Националната гарда, предупредувајќи дека тоа би можело дополнително да ја ескалира ситуацијата. Во САД, сојузните држави обично имаат контрола врз Националната гарда. Во случај на војна или национална вонредна состојба, командата може да ја преземе претседателот на САД.