Анкета во Русија: Германија сега е „најголемиот непријател“

Според анкетата на независниот московски институт за истражување на јавното мислење Левада, Германија во моментов е земјата која Русите ја сметаат за најнепријателска кон Русија, пишува германската новинска агенција дпа. На прашањето за земјите со најнепријателски став, 55 проценти од испитаниците ја навеле Германија како прва - што е зголемување од 40 процентни поени во споредба со мај 2020 година, соопшти центарот Левада во Москва.

Влијанието на Трамп и Мерц

Дваесет години САД беа во таа позиција, но сега само 40 отсто од испитаниците ги гледаат како непријателска земја - во споредба со 76 проценти претходната година. Како што е наведено, тој пад е поврзан со подобрувањето на односите меѓу Русија и САД под претседателот Доналд Трамп.

За разлика од тоа, Германија е сè повеќе под оган од рускиот врв, меѓу другото, поради испораката на оружје во Украина, која беше нападната од Русија.

Тонот е дополнително заострен откако канцеларот Фридрих Мерц ја презеде владата. Русите ја рангираа Велика Британија (49 отсто) на второ место меѓу непријателските земји, а Украина (43 насто) на трето место.

Белорусија и Кина - најдобри пријатели

Во анкетата, испитаниците одговорија и на прашањето со кои земји, според нив, Русија има најблиски и најпријателски односи. На прво место, со 80 проценти, е соседна Белорусија, а две третини од испитаниците ја навеле Кина.

По неа следуваат Казахстан (36 отсто), Индија (32) и Северна Кореја (30).

Резултатите од анкетата ја одразуваат и официјалната политика на Кремљ, кој од почетокот на војната против Украина го подели светот на пријателски и непријателски земји. Тонот е особено остар кон Германија, која со години е еден од најважните купувачи на руски гас во ЕУ, а сега е цел на критики во Москва поради нејзината воена помош за Украина.

Според Левада центарот, во периодот од 22 до 28 мај анкетирани се 1.613 лица над 18 години, пренесува дпа.