Хуманитарни организации бараат прекин на блокадата на Газа

Поради катастрофалната ситуација во Појасот Газа, повеќе од 100 хуманитарни организации побараа слободен пристап до областа. Организациите повикаа на итни преговори за прекин на огнот, отворање на сите гранични премини и непречен проток на помош низ структурите контролирани од ОН. Во изјавата потпишана од 115 организации се наведува и дека постои закана од ширење на „масовен глад“ на теренот. Поради блокадата, тони храна, вода, медицински материјали и гориво остануваат неискористени во магацини надвор од Газа, стои во апелот до меѓународната заедница. „Ограничувањата, одложувањата и фрагментацијата предизвикани од целосната опсада на израелската влада предизвикаа хаос, глад и смрт“, пишуваат организациите.

ОН: Многу мртви на местата за дистрибуција на храна

Откако  Хуманитарната фондација за Газа (ГХФ),  поддржана од  Израел  и САД, ја презеде дистрибуцијата на храна кон крајот на мај, особено децата и постарите лица сè повеќе страдаат од неухранетост и глад. Смртоносни инциденти на местата за дистрибуција на помош се случуваат речиси секојдневно.  Според ОН, најмалку 1.000 Палестинци се убиени оттогаш при барање храна на патиштата наменети за хуманитарна помош или на местата за дистрибуција на храна.

Меѓутоа, ГХФ го побива ова. Според фондацијата, проблемот за ОН и другите хуманитарни работници во регионот не е тоа што им е забранет пристапот до Појасот Газа. „Проблем се капацитетот и организацијата, а светот ја заслужува вистината за оваа разлика“, објави ГХФ. Организацијата ја повтори својата понуда за соработка со ОН во снабдувањето на Појасот Газа, изјавувајќи дека е подготвена да ги заштити пратките со помош што влегуваат во Газа  и работниците на ОН на терен. Помошните резерви што стојат неискористени во магацините би можеле да се достават со помош на организацијата.

„Изгладнувањето е воено злосторство“

„Владите повеќе не можат да чекаат дозвола за дејствување“, се истакнува во апелот. Она што е потребно е итен и траен прекин на огнот, непречен пристап и мисија за помош предводена од ОН која не е контролирана од војската.

„Хуманитарниот систем предводен од ОН не пропадна, туку е спречен да функционира“, изјавуваат организациите, предупредувајќи го Израел: „Изгладнувањето на цивилите како  оружје на војната е воено злосторство“.

Погодени се и самите хуманитарни работници

Не само  населението на Газа, туку и хуманитарните работници во самиот регион сега зависат од испораките на помош. „Со целосно намалени залихи, хуманитарните организации се принудени да ги гледаат своите колеги и партнери како им паѓаат пред очи“, се наведува во писмото.

Потписници на апелот се хуманитарни организации од целиот свет, вклучувајќи ги Лекари без граници, Спасете ги децата и Оксфам. Од Германија, Светска помош против глад, Каритас, Форумот за цивилна мировна служба и Светска мировна служба, меѓу другите, го потпишаа апелот.