САД им нудат пари на мигрантите за „самодепортација“
6 мај 2025
Администрацијата на САД на чело со претседателот Доналд Трамп сака да им исплати на илегалните имигранти 1.000 долари (околу 882 евра) ако доброволно ја напуштат земјата. Министерството за внатрешна безбедност објави дека секој што ќе ја користи функцијата „самодепортација“ преку соодветна апликација ќе ги добие парите. Штом апликацијата потврди пристигнување во матичната земја, парите ќе бидат исплатени. Владата на САД ќе ги покрие и трошоците за финансирање на заминувањето.
Апликацијата за барања за азил станува апликација за депортации
Откако ја презеде функцијата, Трамп зазема остар став кон миграцијата. Под администрацијата на претходникот на Трамп, Џо Бајден, мигрантите можеа да ја користат апликацијата CBP One за да закажат термини за нивните барања за азил на граничните премини на САД од Мексико, на пример. Под водство на Трамп, апликацијата беше целосно пренаменета за депортации и преименувана во CBP Home. Луѓето кои живеат нелегално во САД сега можат да ја користат апликацијата за да покажат дека сакаат да заминат.
Министерството очигледно сака да заштеди трошоци
Според Министерството за внатрешна безбедност, просечната цена за апсење, притворање и депортација на нелегален имигрант е 17.121 американски долари (приближно 15.110 евра). Секој што ќе ја изрази својата намера доброволно да замине преку апликацијата ќе биде ослободен од притвор, се вели во соопштението. Сепак, лицето мора да докаже дека презема „разумни чекори за да го заврши своето заминување“. „Доколку сте тука нелегално, самодепортацијата е најдобриот, најбезбедниот и најисплатливиот начин да ги напуштите Соединетите Американски Држави и да избегнете апсење“, рече министерката за внатрешна безбедност Кристи Ноем, промовирајќи ја програмата.