030711 Klage Euro-Rettungsschirm

Еден од поднесувачите е Јоаким Штарбати, професор по економски науки. Тој на времето тужеше и против воведувањето на еврото, но загуби. Ако овој пат успее со тужбата, тоа би предизвикало земјотрес во еврозоната.

Професор Штарбати се смета себеси за борец за право и поредок, за придржување кон договорите на ЕУ и кон германскиот устав. А во уставот се вели дека мора да биде одржана сопственоста на граѓаните, посебно паричниот имот. Штарбати смета дека се тие загрозени.

„Европската централна банка води изразито опасна политика, оти ако откупува обезвреднети државни обврзници, таа го монетаризира долгот на државите. Таа, значи, ги финансира државните долгови, печати пари за да ги финансира. Тоа долгорочно води кон инфлација, а со тоа и кон намалување на вредноста на паричниот имот“, објаснува професорот.

И Европскиот фонд за спас е противуставен

Според него, Фондот за спас, востановен од ЕУ за презадолжените држави како Грција, е во спротивност со правните одредби за германскиот државен буџет. Бундестагот би морал да дава согласност за секое издвојување пари за потребите на Фондот за спас, наведуваат Штарбати и неговите истомисленици во тужбата до Уставниот суд. Натамошен аргумент на тужителите е кршењето на одредбата од договорот за начинот на функционирање на ЕУ, во која стои дека Унијата не гарантира за обврските на поединечните земји членки.

„И сега господин Шојбле вели дека тоа смее да се прави, ако се прави доброволно. Кога тој доброволно дава свои пари, смее да го прави тоа. Но, кога дава пари од даночните обврзници, тогаш прво мора нив да ги праша дали може толку широкоградо да се однесува со нивните пари“.

Грција би морала да банкротира

Јоаким Штарбати смета дека Уставниот суд ќе утврди дека е прекршено правото на парламентот во однос на буџетот, но се надева на уште повеќе:

„Ако судот каже дека се’ што сега се прави е спротивно на правото, тогаш Грција ќе мора да ја напушти еврозоната и ќе мора да биде направено репрограмирање на нејзините долгови. Тоа е неизбежно, оти ова што сега го имаме не е решение за проблемите“.

Само репрограмирање, при кое доверителите би морале да се откажат од дел од побарувањата според договорена квота, би можело да им помогне на земји како Грција повторно да тргнат кон економско заздравување, смета професорот.

Кој има најголема корист од еврото?

Тој има одговор и на укажувањата од банките и политичарите за предностите од заедничката валута, еврото, и предупредувањата дека Германија, како извозна земја, би трпела штета од евентуално враќање кон првобитните национални валути, оти би поскапеле нејзините производи.

„Токму спротивното е точно: Германците би профитирале, оти тогаш еврото или германската марка, зависно од тоа што би било користено, би имале многу поголема вредност во светот. Ние продаваме продукти од висока технологија, кои му се потребни на светот, ако сака да се развива. Тие производи можат да се купат во сосем мал број земји, а нашата е една од нив. Јас тука не разбирам зошто индустријата прави толкав театар“, вели професор Јоаким Штарбати. Одлуката на Уставниот суд ќе биде донесена на есен.

Автор: Дафне Гратвол / Зоран Јордановски

Редактор: Горан Чутаноски