Пападимос ќе ги претстави плановите за штедење

Повеќе десетици илјади Грци во текот на вчерашниот ден демонстрираа со барање на поправедна распределба на товарот при надминувањето на финансиската и должничка криза во земјатa. На маргините на протестите во главниот град Атина и во Солун на кои учествуваа вкупно 50 -тина илјади граѓани дојде до судири меѓу полицијата и маскирани припадници на ултралевичарските групи. Тоа беа први масовни демонстрации по изборот на владата на национално единство на чело со економскиот стручњак Лукас Пападимос. Тој денеска пред парламентот во Атина треба да ги претстави плановите за штедење на неговата влада. Тие ќе бидат содржани во предлог-буџетот за 2012-та година. Нивното спроведување е услов за исплатата на натамошни спасувачки кредити за земјата. Доколку овие кредите не пристигнат Грција во декември ќе се соочи со банкрот.

Имено Грција има итна потреба од деблокирање до 15 декември на шестата транша во износ од осум милијарди евра од помошта од 110 милијарди евра, доделена во 2010-та година на земјата во рамки на првиот спасувачки план.

Лидерите на „тројката“, која ги претставува меѓународните кредитори на Грција - ЕУ, Европската централна банка и Меѓународниот монетарен фонд (ММФ), пак денеска пристигнуваат во Атина, за да ги обноват проверките за финансиската состојба на Грција и да преговараат со новата грчка влада за европскиот спасувачки план за земјата.

Претставниците на „тројката“ ќе имаат разговори со министерот за финансии Евангелос Венизелос и ќе се сретнат и со премиерот Лукас Пападимос.

Автор:СН/ЖА/ртр/афп/миа

Редактор: Ж. Ацеска