Наесен предвремени избори во Бугарија

Терминот за предвремени избори во Бугарија сега треба да му биде поднесен на претседателот на државата Росен Плевнелиев, изјави шефот на владеачките социјалисти Сергеј Станишев. Новите избори треба да се одржат само година и половина по предвремените избори во мај 2013-та. Тие станаа неопходни поради тешкиот пораз на социјалистите на европските избори.

Социјалистите во моментов имаат 83 од 240 места во бугарскиот парламент. На изборите за Европскиот парламент тие остварија многу слаб резултат и со освоени 18,9% од гласовите се најдоа на втората позиција, зад конзервативната опозициона партија ГЕРБ, која освои 30,4% гласови. Владата на Пламен Орешарски почна со работа во мај минатата година, по масовните протести во земјата и падот на владата во која доминираше ГЕРБ. Иако конзервативците и на изборите обезбедија победа, мораа да заминат во опозиција поради тоа што немаа коалициони партнери.