Министрите на ЕУ со опомена за Турција

Меѓу земјите кои претендираат да станат дел од ЕУ е и Турција. Шефовите на дипломатии на ЕУ денеска, меѓу другото, треба да ја отворат и темата - блокада на интернет од страна на турскиот премиер Реџеп Таип Ердоган.

„Она што го видовме во Турција во последните недели, ограничувањето на слободата на мислење и на информирање, предизвика иритации кај многумина европски партнери и кај нас“, изјави во Атина германскиот министер за надворешни работи Франк-Валтер Штајнмајер пред почетокот на денешните разговори. Според него, ЕУ ќе го следи натамошниот развој во Турција „многу внимателно“.

Шефот на германската дипломатија се заложи за продолжување на разговорите со владата во Москва, и покрај конфликтот со Русија околу Украина. ЕУ е единствена во ставот дека анексијата на Крим од страна на Русија е неприфатлива повреда на меѓународното право, рече Штајнмајер во Атина. „Не можеме да поминеме преку овој конфликт, но Русија ќе ни биде потребна ако сакаме да работиме на стабилизирање на Украина“, додаде тој.

Штајнмајер нагласи дека со „Русија ќе мора да се разговара, дури и ако меѓу нас има конфликт“. Вчера, на првиот ден од средбата на министрите за надворешни работи на ЕУ во Атина, од Русија беше побарано да го спроведе ветеното повлекување на своите трупи од граничното подрачје со Украина. Ваков чекор е неопходен за да се намалат значително тензиите на границата, изјави портпаролот на германската влада Штефен Зајберт во Берлин. Тој укажа на најавите на рускиот претседател Владимир Путин во таа насока. Според наводи на НАТО, нема докази дека Русија ја намалува зголемената концентрација на свои трупи во пограничниот регион.

Британскиот министер за надворешни работи Вилијам Хејг затоа на средбата во Атина побара поостар однос кон владата во Москва. „Не видовме вистинска деескалација од страна на Русија. Затоа Европа не смее да попушти и треба да подготвува трет степен санкции“, рече Хејг. Сепак, според шефот на германската дипломатија Штајнмајер, на средбата вчера не се разговарало за санкции. „Во моментов пред нас ја немаме темата санкции, туку тешката задача да ^^ помогнеме на Украина на патот кој ќе и‘ овозможи преживување во иднина“, нагласи тој.