Задоцнето признание на неизмерното страдање

Германија сака поранешните воени заробеници кои се се’ уште живи да ги обесштети за нивните страдања. Тоа го одлучи комисијата за буџет во Бундестагот. Десет милиони евра ќе бидат додадени во буџетот за 2015. година. Како вид на признание, жртвите ќе добијат „симболична финансиска сума“, се наведува во соопштението.

Неизмерно страдање

Уште од самите бројки на човек му се крева косата на глава: за време на Втората Светска Војна имаше 4,5 до 6 милиони советски воени заробеници. Поголемиот дел од нив беа паднаа во заробеништво за време на офанзивата на Германија во Советскиот Сојуз во 1941. година. Уште во првите месеци на војната умреа два милиона, од глад, болест, студ и исцрпенот. Германците не само што не ја почитуваа Женевската конвенција, туку суровоста кон заробениците беше намерна, а цел беше уништување. И како тоа да не беше доволо: специјалните германски командоси меѓу заробените бараа Евреи, високи комесари или на друг начин непријатни луѓе- кои беа стрелани во концентрационите логори или беа убиени во гасни комори. Најмалку 500.000 лица.

До крајот на војната животот го загубија 60 проценти од советските воени заробеници.

Но страдањата на преживеаните заробеници не беа со тоа завршени. Кога се вратија во Советскиот Сојуз, Сталин ги жигоса како соработници, многумина завршија во логори во Сибир. Во целост се рехабилитирани дури во 1995. по распаѓањето на Советскиот Сојуз.

Признание по 70 години

На размерите на овој терор неодамна укажа германскиот претседател Јоахим Гаук, кога под рака со преживеаните и нивните наследници, им оддаде почит на мртвите на воените гробишта. Повод беше 70. годишнината од крајот на војната.

Одамна се бара на преживеаните да им се плати отштета. Сега договорениот надоместок е „добра иницијатива од германскиот Бундестаг“, рече портпаролот на германскиот министер на надворешни работи Франк Валтер Штајнмајер.

Порано и опозициските партии на Зелените и Левицата бараа обесштетување на поранешните воени заробеници, додека владијачките партии на Унијата (ЦДУ/ЦСУ) беа скептична. „Ова е задоцнето и важно признание за историската одговорност на Сојузна Република Германија за тоа поглавје од нацистичката политика на истребување“, изјавија пратениците на Зелените, Фолкер Бек и Свен Кристијан Киндлер. „Истовремено тоа е силен сигнал на пријателство кон Русија, Белорусија и Украина.“ „Конечно и Унијата ја прифати моралната обврска на Сојузна Република Германија, за овие малку преживеани жртви да плати симболичен надоместок“, рече пратеникот на Левицата , Јан Корте.

И навистина, станува збор за симболично обесштетување. Се проценува дека се живи уште околу 4.000 советски воени заробеници. Со вкупен буџет од 10 милиони евра во фондот, тоа би било само 2.500 евра по жртва.