Бугарија напредува, но влезот во Шенген-зоната се`уште неизвесен

Канцеларката Ангела Меркел не можеше да му вети на својот бугарски колега, Бојко Борисов, дека неговата земја експресно ќе биде примена во европскиот безграничен простор. По средбата со бугарскиот премиер во Софија, Меркел истакна дека Германија „објективно ќе ја разгледа состојбата“ пред конечното донесување на одлуката за прием на Бугарија во Шенген-зоната во ноември. Во секој случај, канцеларката го пофали напредокот што земјата го постигнала во борбата против организираниот криминал и корупцијата.

Меркел имаше пофални зборови и за „солидната финансиска политика“ на балканската земја. Според неа, Бугарија со полн пареа ја спроведува политиката на стабилност, што се бара во ЕУ.

Борисов: Не прифаќаме шенгенска граница на Дунав

Бугарскиот премиер, пак, Бојко Борисов, убедуваше дека Бугарија ќе ги исполни критериумите за влез во Шенген-зоната, но истовремено јасно стави до знаење дека Бугарија нема да прифати шенгенска граница по течението на реката Дунав. Реката претставува природна граница меѓу Бугарија и Романија, кои и двете се залагаат за влез во европскиот безграничен простор до 2011 година. Формално, приемот на земјите во Шенген-зоната најмногу зависи од тоа дали надворешната граница би била доволно безбедна. Во моментов ЕУ најмногу стравува од корупцијата и криминалот во Бугарија.

Автор: ТТ/ГЧ/дпа

Редактор: Симе Недевски