Берлин загрижен за ескалацијата на Блискиот исток

Владиниот портпарол апелира до палестинската влада и до сите палестински организации да помогнат во ослободувањето на грабнатиот израелски војник. Тој мора да биде итно и безусловно пуштен на слобода, побара портпаролот Улрих Вилхелм. Неговиот колега од Министерството за надворешни работи Мартин Јегер, пак, изрази разбирање за постапките на Израел:

„Овде постои сосема директна и разбирлива поврзаност со грабнувањето на израелскиот војник, на чие скорешно ослободување се надеваме. Германската влада меѓутоа апелира до обете страни да се однесуваат воздражно и да не дозволат заострената ситуација натаму да ескалира.„

Шефот на дипломатијата Франк Валчтер Штајнмајер по средбата со неговиот италијански колега Масимо Далема порача:

„Минатиот викенд лично разговарав со палестинскиот претседател Махмуд Абас и го замолив да стори се‘ за грабнатиот израелски војник да се врати дома здрав и жив.„

На апелот за пуштање на војникот на слобода му се приклучија и сите политички партии на Германија. Претседателката на Централниот совет на Евреите во Германија, Шарлоте Кноблох, ја бранеше операцијата на израелската армија:

„Причината за влегувањето им е на сите позната. Имаше и ултиматум до Палестинците, но тие не одговорија. Сега државата се разбира се обидува да му го спаси животот на 19-годишниот војник„ – порача Кноблох на маргините на средбата на Светскиот еврејски конгрес што се одржува во Берлин.