ملل متحد از تاجیکستان خواست اخراج مهاجران افغان را متوقف کند
۱۴۰۳ بهمن ۸, دوشنبه
هزاران افغان از دهه ۱۹۹۰ به اینسو به کشور همسایه تاجیکستان آواره شده اند. آنها از پیامدهای جنگ علیه شوروی سابق در افغانستان، ناآرامی‌های پس از حضور ایالات متحده در سال ۲۰۰۱ و سرکوبهای حاکمیت اول و دوم طالبان، به این کشور پناه برده اند.
کمیشنر عالی پناهندگان سازمان ملل متحد (UNHCR) به خبرگزاری فرانسه گفت: «یو‌ان‌اچ‌سی‌آر از بازگشت دادن اجباری حداقل ۸۰ پناهجوی افغان به افغانستان در دسمبر ۲۰۲۴ آگاه است.» او افزود که «اکثر» برگشت داده شدگان، دارای اسناد معتبر و کارت پناهندگی هستند.
صفحه اینستاگرام ما را دنبال کنید!
این سازمان با ارسال یک ایمیل روز شنبه گفت: «بازگشت اجباری کسی که در معرض شکنجه یا سایر موارد نقض جدی حقوق بشر قرار دارد، با قوانین مهاجرت تاجیکستان مغایرت دارد.»
در ایمیل آمده است که تا پایان سال ۲۰۲۴ تقریباً ۹ هزار پناهجوی افغان در تاجیکستان زندگی می‌کردند.
تاجیکستان می‌گوید مهاجران افغان از بسیاری از حقوقی که شهروندان تاجیک برخوردار هستند، مستفید می‌شوند.
اما سازمان‌های حقوق بشری هشدار می‌دهند کسانی که بازگشت داده می‌شوند، در معرض خطر آزار و اذیت، از جمله شکنجه قرار دارند.
مطالب ویدیویی را در صفحه یوتیوب ما ببینید!
تاجیکستان و افغانستان روابط فرهنگی و زبانی قوی دارند، اما از زمان بازگشت طالبان به قدرت در سال ۲۰۲۱، روابط دو کشور تنش‌آلود شده است.
برخلاف دیگر رهبران آسیای مرکزی، امامعلی رحمان، رئیس جمهور تاجکستان، از طالبان، به ویژه رفتار آنها با تاجیک‌ها که دومین گروه قومی بزرگ در افغانستان می‌باشد، انتقاد کرده است.
سایر کشورهای هم مرز با افغانستان مانند پاکستان و ایران نیز مدت‌هاست که مهاجران افغان را اخراج می‌کنند.