تاجیکستان؛ افغان‌ها از ترس اخراج در خانه پنهان می‌شوند

به نظر می‌رسد که  تاجیکستان  از چند ماه به اینسو محدودیت‌ها را بالای مهاجران افغان بیشتر کرده است.

مهاجران افغان مدعی اند که تاجیکستان از شش ماه به ایسنو بازداشت و اخراج  افغان‌ها را شدت بخشیده است.

شماری از این مهاجران به دویچه‌وله می‌گویند، با وجود داشتن مدارک اقامت و ثبت بودن در کمیساریای عالی سازمان ملل، پولیس تاجیکستان در محلات مهاجرنشین گشت‌زنی کرده، مردان و جوانان را پس از بازداشت  مستقیماً بهافغانستان  اخراج می‌کند.

یکی از مهاجران با صدایی بغض‌آلود، می‌گوید: «پولیس بلاک به بلاک و خانه به خانه می‌گردد. مردان و جوانان را بازداشت می‌کند. کسی از ترس بیرون رفته نمی تواند.»

زندگی پنهان

یکی از جوانان افغان که به دلیل ترس از بازداشت جرئت بیرون رفتن از خانه را ندارد، می‌گوید: «۱۸ روز می‌شود که از خانه بیرون نشده‌ام؛ در خانه زندانی هستیم، حتی جرئت رفتن به دهلیز را هم ندارم. پولیس زیر بلاک‌ها گشت زنی می کند و وارد دهلیزها می‌شود؛ افغان‌ها، به‌ویژه جوانان را بازداشت می‌کنند. پسران جوان نمی‌توانند از خانه بیرون شوند.»

این  مهاجر افغان  چشم دیدش را بیان می کند و می گوید که چندی پیش، یک مرد افغان را اخراج کردند. به گفته او، حالا همسر و فرزندان این مرد در بی سرنوشتی بسر می برند، در تاجیکستان تنها مانده‌اند و اشک می ریزند.

به گفته این مهاجران افغان در این روند اخراج‌ها حتی به زنان نیز رحم نشده و شماری از زنان و دختران جوان نیز از تاجیکستان اخراج شده‌اند.

اخراج داکتران افغان

یکی دیگر از مهاجران افغان گفت، چند داکتر افغان که در یکی از شفاخانه‌های تاجیکستان کار می‌کردند و به مهاجران کمک‌های دارویی می‌رساندند، نیز از  این کشور اخراج شده‌اند. او می‌افزاید: «این داکتران داروهای اهدایی صلیب سرخ و نهادهای دیگر را به افغان‌ها می‌دادند. حدود چهار داکتر در شفاخانه مشغول به کار بودند، اما همه را اخراج کردند.»

‌این مهاجران می گویند که بارها به سفارت افغانستان در شهر دوشنبه  مراجعه کرده اند، اما هیچ اقدامی از سوی مقام های این سفارت صورت نگرفته است. سفارت افغانستان در تاجیکستان تاکنون از سوی سفیر حکومت پیشین اداره می شود.

وزارت امور مهاجرین و عودت کنندگان  طالبان  هفته گذشته از اخراج نزدیک به ۵۰ مهاجر افغان از تاجیکستان خبر داد. این افراد از طریق بندر شیرخان ولایت کندز به کشور بازگردانده شدند. به گفته مدیریت سرحدی این بندر، ۳۶ نفر دارای اسناد اقامت تاجیکستان بودند و ۱۲ نفر دیگر با وجود داشتن پاسپورت و ویزا اخراج شده اند . دلیل اخراج‌شان مشخص نیست.

تاجکیستان  پس از تسلط طالبان در افغانستان  میزبان مقا‌م‌های حکومت پیشین و شماری از اعضای جبهه مقاومت ملی افغانستان نیز است. تا هنوز مشخص نیست که آیا تاجیکستان اخراج مهاجران افغان را به درخواست طالبان شدت بخشیده یا خیر.