የመጋቢት 29 ቀን፣ 2017 ዓ.ም የስፖርት ዘገባ

ከአንደኛ እስከ ስምንተኛ ድረስ ለሚወጡ አትሌቶች በአጠቃላይ በሚሊዮን የሚቆጠር ዶላር ሽልማት በተዘጋጀበት አዲሱ የግራንድ ስላም የአትሌቲክስ ፉክክር  ኢትዮጵያውያን ድል የቀናቸው ነው ። የፕሬሚየር ሊግ መሪው ሊቨርፑል ሽንፈት አስተናግዷል ። በፎርሙላ አንድ የመኪና ሽቅድምድም ማክስ ፈርሽታፐን ተጨማሪ ድል ተቀዳጅቷል ። ከገና ጨዋታ ጋር በሚመሳሰለው የሆኪ ስፖርት ሊግ አሌክሳንደር ኦቬችኪን በርካታ ግቦችን በማስቆጠር ክብረ ወሰን ሰብሯል ። በርካታ ደጋፊዎቹ አድናቆታቸውን ቸረውታል፤ ምእራባውያን የመገናኛ አውታሮች አሌክሳንደር የፕሬዚደንት ቭላድሚር ፑቲን ደጋፊ መሆኑን አጉልተዋል ። በጀርመን ቡንደስሊጋ መሪው ባዬርን ሙይንሽን እና ተከታዩ ባዬር ሌቨርኩሰን እንዲሁም አይንትራኅት  ፍራንክፉርት  ሽንፈት ገጥሞታል ።  

አትሌቲክስ

በሳምንቱ መጨረሻ ላይ በተለያዩ የዓለማችን ከተሞች በተከናወኑ የማራቶን ፉክክሮች ኢትዮጵያውያን አትሌቶች ድል ተቀዳጅተዋል ።  ጀርመን ውስጥ ቅዳሜ ዕለት በተከናወነው የቤርሊን ግማሽ ማራቶን ፉክክር ኢትዮጵያውያን አትሌቶች በሁለቱም ፆታ አሸናፉ ሁነዋል ።

በሴቶች የግማሽ ማራቶን ፉክክር ከአንደኛ እስከ ሦስተኛ ደረጃውን ኢትዮጵያውያቱ ተቆጣጥረዋል ። አትሌት ፎትየን ተስፋይ 1:03.35 ሮጣ በመግባት የቦታውን ክብረ ወሰን ጭምር አሻሽላ በአንደኛነት ለድል በቅታለች ። አትሌት ፍታው ዘራይ 1:07.01 ሁለተኛ እንዲሁም አትሌት ዓለምአዲስ እያዩ 1:07.12 ሦስተኛ ደረጃ በመያዝ ለድል በቅተዋል ።

በወንዶች ተመሳሳይ የግማሽ ማራቶን ፉክክር ደግሞ ኢትዮጵያዊው አትሌት ገመቹ ዲዳ ርቀቱን 58:43 ሮጦ በመግባት በአንደኝነት አሸንፏል ። ኬኒያዊው አትሌት ሪቻርድ ኤቲር ከገመቹ በ47 ሰከንዶች ተበልጦ የሁለተኛ ደረጃ አግኝቷል ። የሦስተኛ ደረጃው ለጀርመን የሚሮጠው አትሌት አማናል ጴጥሮስ ሁኗል ።

ቅዳሜ ዕለት በተከናወነው የቪዬና ማራቶን ውድድር ኢትዮጵያዊው አትሌት ሀፍታሙ አባዲ በ2:08.28 በመግባት በአንደኝነት አሸንፏል ። ሌላኛው ኢትዮጵያዊ አትሌት ሞጎስ ጡዑማይ በ2:10.33 ሮጦ በማጠናቀቅ ሦስተኛ ደረጃ ማግኘቱን የኢትዮጵያ አትሌቲክስ ፌዴሬሽን ዐሳውቋል ።

የግራንድ ስላም ፉክክር

በአጠቃላይ የ12,6 ሚሊዮን ዶላር ሽልማት በተዘጋጀበት እና በአራት የተለያዩ ከተሞች በተለያዩ ጊዜያት በሚደረገው የግራንድ ስላም ውድድርም ኢትዮጵያውያን ከወዲሁ ድል እየቀናቸው ነው ። ጃማይካ ኪንግስተን ከተማ ውስጥ ከዐርብ መጋቢት 27 ቀን፣ 2017 ዓ.ም እስከ እሁድ ለሦስት ቀናት በተካሄደው የግራንድ ስላም ውድድር ኢትዮጵያውያን አትሌቶች ከአሸናፊዎቹ ተርታ ተመድበዋል ። በአራቱ ከተሞች ፉክክር ከፍተኛ ነጥብ ያስመዘገበ አትሌት በየውድድሩ የ100,000 የአሜሪካ ዶላር ይሸለማል፤ 2ኛ ለወጣ አትሌት የ50,000 እንዲሁም ለሦስተኛ ደረጃ የ30,000 ዶላር ሽልማት ተዘጋጅቷል ። እስከ ስምንተኛ ደረጃ ድረስ የወጡ አትሌቶች በወንድም በሴትም ፉክክር ተሸላሚ ይሆናሉ ።

የግራንድ ስላም ፉክክር በውድድር ኮሚቴው የቀደመ ብቃታቸው በተለያየ መንገድ ተገምግሞ የተመረጡ 48 ተወዳዳሪዎች የሚሳተፉበት ነው ። እነዚህ አትሌቶችም በግራንድ ስላማ አራት የተለያዩ ውድድሮች ላይ ለመሳተፍ የወሰኑ ናቸው ። ያም ብቻ አይደለም ሌሎች 48 ተፎካካሪዎችም የቅርብ ጊዜ ብቃታቸው ታይቶ በውድድር ኮሚቴው ይመረጣሉ ። እነዚህ 96 አትሌቶች በተለያዩ ጊዜያት በሚደረጉ ፉክክሮች የተሻለ ነጥብ ለማምጣት በአራት የተለያዩ ከተሞች ይወዳደራሉ ። የግራንድ ስላም ቀጣይ ውድድሮች ከአንድ ወር በኋላ በዩናይትድ ስቴትስ ሚያሚ፤ ከዚያም ግንቦት መጨረሻ እና ሰኔ አጋማሽ ላይ ፊላዴልፊያ እና ሎስ አንጀለስ ውስጥ ሊከናወን ቀጠሮ ተይዟል ። ለመሆኑ የግራንድ ውድድር ነጥብ አሰጣጥ እና ይዘቱ ምን ይመስላል? ከኢትዮጵያስ እነማን ተሳታፊ ናቸው፣ ምን አይነስት ውጤታት አስመዘገቡ?  የኢትዮ ኤፍ ኤም 107.8 ኢትዮ ስፖርት አዘጋጅ እና አቅራቢ ምሥጋናው ታደሰ ።

የግራንድ ስላም ፉክክር በጃማይካ ኪንግስተን

ጃማይካ ኪንግስተን ከተማ ውስጥ በሳምንቱ መጨረሻ በተከናወነው የወንዶች 3000ሜትር ኢትዮጵያዊው አትሌት ሀጎስ ገብረ ሕይወት 7: 51.55 በመሮጥ አሸንፏል ። አራተኛ ደረጃ ይዞ ባጠናቀቀበት በመጀመርያው የ5000 ሜትር ረጅም ርቀት የሰበሰበውን ነጥብ 17 በማድረስ በኪንግስተኑ ፉክክር በአጠቃላይ ሁለተኛ ደረጃ አግኝቷል ።  ሁለተኛ የወጣው ጥላሁን ኃይሌ በድምር ውጤት አራተኛ ደረጃ ይዞ አጠናቋል። በሌላ ውድድር ኢትዮጵያዊቷ አትሌት እጅጋየሁ ታዬ አሸናፉ ሁናለች ።

በጃማይካ ኪንግስተን በተደረገው የ5000 ሜትር ረጅም ርቀት ግራንድ ስላም ትራክ አትሌት እጅጋየሁ ታዬ በአንደኝነት ለድል የበቃች 14:54.88 ሮጣ በመግባት ነው ። በ3000ሜትር ረጅም ርቀትም በተመሳሳይ በአንደኝነት ያጠናቀቀችው ይህችው ብርቅዬ አትሌት እስካሁን ያገኝችውን ነጥብ 24 በማድረስ የርቀቱ ባለድል ሁናለች ። ሌላኛዋ ኢትዮጵያዊት አትሌት ጽጌ ገብረሰላማ 3ኛ ደረጃን ይዛ አጠናቃለች። ሌላኛዋ ኢትዮጵያዊት አትሌት ድርቤ ወልተጂም በዚሁ ውድድር አሸንፋለች።

በሴቶች 1500 ሜትር አጭር ርቀት በተደረገው ውድድር አትሌት ድርቤ 4: 04.51 በመግባት ነው በበላይነት ያጠናቀቀችው ። አትሌት ድርቤ በ800 ሜትር 2ኛ የወጣችበት ውጤትም ተደምሮላት በአጠቃላይ ነጥቧ 20 አድርሳለች።

እግር ኳስ

የፕሬሚየር ሊግ መሪው ሊቨርፑል ከረዥም ጊዜ ተከታታይ ድል በኋላ ትናንት ሽንፈት አስተናግዷል ። የፕሬሚየር ሊግ የደረጃ ሰንጠረዡን በ73 ነጥብ የሚመራው ሊቨርፑል የ3 ለ2 ሽንፈት የደረሰበት ስምንተኛ ደረጃ ላይ በሚገኘው ፉልሀም ነው ። እንዲያም ሆኖ ግን ተከታዩ አርሰናል በኤቨርተን ሜዳ አንድ እክል በመውጣት ነጥብ በመጣሉ አሁንም ከሊቨርፑል ጋር ያለው የነጥብ ልዩነት እንደተራራቀ ነው ። አርሰናል በሊቨርፑል በ11 ነጥብ ተበልጦ 62 ነጥብ ሰብስቧል ። በ57 ነጥብ ሦስተኛ ደረጃ ላይ የሚገኘው ኖቲንግሀም ፎረስት ቅዳሜ ዕለት በአስቶን ቪላ የ2 ለ1 ሽንፈት አስተናግዷል ።

ከብሬንትፎርድ ጋር ትናንት ያለምንም ግብ የተለያየው ቸልሲ በ53 ነጥብ አራተኛ ደረጃ ላይ ይገኛል ። ከበታቹ ማንቸስተር ሲቲ በ52 ነጥብ ይገኛል፤ 13ኛ ደረጃ ላይ ከሚገኘው ማንቸስተር ዩናይትድ ጋር ትናንት ያለምንም ግብ ተለያይቷል ።

ከ31 ግጥሚያዎች 10 ነጥብ ብቻ ማግኘት የቻለው ሳውዝሐምፕተን ከወዲሁ መውረዱን አረጋግጧል ።  ወራጅ ቀጣናው ውስጥ ከበላዩ ላይስተር ሲቲ በ17 እንዲሁም ኢፕስዊች ታወን በ20 ነጥብ ይገኛሉ ። ከወራጅ ቃጣናው ጠርዝ አንድ ከፍ ብሎ በ17ኛ ደረጃ ላይ የሚገኘው ዎልቭስ 32 ነጥብ አለው ። ዛሬ ማታ ክሪስታል ፓላስ ከኒውካስል ጋር ተስተካካይ ግጥሚያቸውን ያደርጋሉ ።

ቡንደስሊጋ

በጀርመን ቡንደስሊጋ ሁለተኛ ደረጃ ላይ የሚገኘው ባዬር ሌቨርኩሰን ቅዳሜ ዕለት ሐይደንሀይምን 1 ለ0 ድል አድርጓል  ። በ68 ነጥብ ደረጃውን የሚመራው ባዬር ሙይንሽን አውግስቡርግን 3 ለ1 ማሸነፍ ችሏል ። በዚህም መሰረት ከባዬር ሌቨርኩሰን ጋር የስድስት ነጥብ አላቸው ። በ48 ነጥብ ሦስተኛ ደረጃ ላይ የሚገኘው አይንትራኅት ፍራንክፉርት በቬርደር ብሬመን የ2 ለ0 ሽንፈት ደርሶበታል ። ትናንት ሳንክት ፓውሊ እና ቦሩስያ ሞይንሽንግላድባኅ አንድ እኩል ተለያይተዋል ። ቅዳሜ ዕለት ሽቱትጋርት ቦሁምን 4 ለ0 ድል አድርጓል ። ላይፕትሲሽ ሆፈንሀይምን 3ለ1 ቢያሸንፍም በ45 ነጥቡ አምስተኛ ደረጃ ላይ ይገኛል ። ከበላዩ በ46 ነጥብ የሰፈረው ማይንትስ ከሆልሽታይን ኪየል ጋር አንድ እኩል ተለያይቷል ።

የበረዶ ላይ ሆኪ ስፖርት

ከገና ጨዋታ ጋር በሚመሳሰለው የአሜሪካው የበረዶ ግግር ላይ ብሔራዊ የሆኪ ሊግ ፉክክር ሩስያዊው አሌክሳንደር ኦቬችኪን በርካታ ግቦችን በማስቆጠር ክብረ ወሰን ሰብሯል ። በርካታ ደጋፊዎቹ አድናቆታቸውን ችረውታል፤ ምእራባውያን የመገናኛ አውታሮች አሌክሳንደር የፕሬዚደንት ቭላድሚር ፑቲን ደጋፊ መሆኑን አጉልተዋል ዘግበዋል ። አሌክሳንደር በዋይኔ ግሬትዝኪ ተይዞ የቆየውን በአንድ የውድድር ዘመን 894 ግቦችን የማስቆጠር ክብረወሰን ነው የሰበረው ።  ከዩክሬን ወረራ በኋላም አሁንም የፑቲን ደጋፊ እንደሆን የተጠየቀው አሌክሳንደር፦ «እንግዲህ ፕሬዚደንቴ ናቸው» ሲል መልስ ሰጥቷል ። 

የፎርሙላ አንድ የመኪና ሽቅድምድም

በፎርሙላ አንድ የመኪና ሽቅድምድም የሬድ ቡል አሽከርካሪው ማክስ ፈርሽታፐን ተጨማሪ ድል ተቀዳጅቷል ። ሱዙኪ መወዳደሪያ ስፍራ ውስጥ ትናንት በተደረገው የጃፓን ግራንድ ፕሪ ፉክክር አንደኛ የወጣው ማክስ ፈርሽታፐን እስካሁን በተደረጉ ውድድሮች በሰበሰበው ነጥብም ይመራል ። ላንዶ ኖሪስ እና ዖስካር ፒያስትሪ በማክላረን ተሽከርካሪያቸው የሁለተኛ እና የሦስተኛ ደረጃ አግኝተዋል ። ዘንድሮ ለፌራሪ የፈረመውና ለበርካታ ዓመታት በመርሴዲስ ተሽከርካሪ ለድል የበቃው ሌዊስ ሐሚልተን የስድስተኛ ደረጃ አግኝቶ አጠናቋል ።

ማንተጋፍቶት ስለሺ

ኂሩት መለሠ