በኦሮሞ ብሔረሰብ አስተዳደር ዞን በቦምብ ጥቃት 5 ሰዎች መቁሰላቸውን የአማራ ክልል አስታወቀ

ድምፃዊ ሐጫሉ ሁንዴሳ ከተገደለ በኋላ በአማራ ክልል የኦሮሞ ብሔረሰብ አስተዳደር ልዩ ዞን በታጣቂዎች ጥቃት መፈጸሙን የክልሉ መንግሥት አስታወቀ። የክልሉ ርዕሰ መስተዳድር ተመስገን ጥሩነህ እንዳሉት ጥቃቱ የተፈጸመው የኦሮሞ ብሔረሰብ አስተዳደር ልዩ ዞን ደዌ ሐረዋ በተባለ ወረዳ ነው።

“በቦራ ከተማ በደዌ ሐረዋ ወረዳ የሸኔ ቡድን ታጣቂዎች ተደራጅተው ሕዝቡን ለማሸበር ተልዕኳቸውን ለመፈጸም” ሙከራ ማድረጋቸውን የአማራ ክልል ርዕሰ መስተዳድር ተመስገን ጥሩነህ ተናግረዋል። ርዕሰ መስተዳድሩ የታጣቂ ቡድኑ መሪ የተባለ ግለሰብ “ከጸጥታ ኃይሎች በተደረገ የተኩስ ልውውጥ” መገደሉን እና ተጠርጣሪዎች እንዲሁም የጦር መሳሪያዎች በቁጥጥር ሥር መዋሉን ገልጸዋል። በተኩስ ልውውጡ አንድ የፖሊስ አባል መቁሰላቸውን አስረድተዋል።

በዚያው የኦሮሞ ብሔረሰብ አስተዳደር ልዩ ዞን በባቲ ከተማ በተወረወረ ቦምብ አምስት ሰዎች መቁሰላቸውን አቶ ተመስገን ለብሔራዊው የቴሌቭዥን ጣቢያ ተናግረዋል።

የባሕር ዳሩ የዶይቼ ቬለ ወኪል ዓለምነው መኮንን ከክልሉ እና ከዞኑ ባለሥልጣናት በኦሮሞ ብሔረሰብ አስተዳደር ልዩ ዞን የተከሰተውን ሁኔታ አጣርቷል። ዘገባውን ለማድመጥ የድምፅ ማዕቀፉ ይጫኑ።

ዓለምነው መኮንን

እሸቴ በቀለ